लघु कथा : सहयोग

- निर्मला खड्का 

 

 टेलिभिजनमा  समाचार आइ रहेको थियो । " आज बिहानै हिम पैह्रो संगै सेती नदीमा आएको बाढीले सेती नदीको किनारमा बसेको सारा बस्ती बगाएर लागेको छ  ।  भर्खरैको ताजा समाचार अनुसार सात जनाको मृत शव फेला परेको छ भने कयौं मानिसहरु अझै लापता छन । उनीहरुको खोजी कार्यमा  नेपाल प्रहरी र सेनाका जवानहरु तदारुकताका साथ लागी रहेको जानकारीमा आएको छ " । बडो ध्यान पुर्वक समचार सुनी रहेको रामे जुरुक्क उठ्छ बसेको ठाउँबाट । भित्तामा टाँगी रहेको टिशर्ट र पाइन्ट लगाउछ । हतार हतार बाहिर निस्कन्छ । एउटा छापाखाना अगाडी गएर टक्क अडिन्छ र माथि झुण्डी रहेको बोर्डमा  हेर्छ " शीतल  छापाखाना "। खुसुक्क भित्र पस्छ ।

"नमस्कार सर " दुई  हात उठाउदै भन्छ  रामे । भित्र अफिसमा एकजना अधबैसे मानिस व्यस्त देखिन्थे काममा ।

"नमस्कार हजुर, आउनुहोस् " ती व्यक्तिले रामलाई चिनेकै हुनु पर्छ ।

"सर, आज धेरै व्यस्त छु म  उता सेती नदीमा बाढी आएर धेरै जनमाल को क्षती भएछ । चन्दा संकलन गरेर सहगोय गर्न जानु पर्ने भो  त्यसैले बाढी पिडीत का लागी सहयोग भनेर हजार थान जती चन्दा रसिद  छापिदिनुहोस है साँझ सम्म " उसले मुहार गम्भिर बनाउदै भन्यो ।

"हुन्छ, साँझैँ आएर लैजान सक्नु हुन्छ म छापेर राखिदिने छु  " ती ब्यक्तीले जवाफ दिए । रामे छापाखानाबाट बाहिर निस्किदा उसको अनुहार हँसिलो र ओठको मुस्कान गहिरो थियो ।उसले नाम र दाम कमाउने एउटा मौका पाएको थियो ।