आलीस मिलर

    कहिले कतै  यसो पत्र-पत्रिका या सामाजिक संजाल भनौ या जही होस् नजर डुलाई रहदा केहि यस्ता हस्तीहरु बारे पढ्न, जान्न या उनीहरुको जीवन बारे बुझ्न पाईन्छ जसले जीवनलाई एउटा गतिलो प्रेरणा दिदै मन भित्र एक किसिमको अनौठो आत्मिक सन्तुष्टि दिएर जान्छ । हरेक जीवनको आ-आफ्नो चाह ,उद्देश्य अनि लक्ष हुन्छन/छन्  । कती आफ्नो बाटोमा  हतोत्साहित भएर अन्तै  पाईला मोडछन भने कती रोकिन्छन ,कती ठोकिन्छन लड्छन उठछन अनि  आफ्नो लक्षमा पुग्छन ट कतीले लक्ष चुमे पछी उद्देश्य नै भुल्छन ,कयौं बिद्रोही बन्छन भने कोई संघर्समै रमाउँछन । हामीमा केहि पाएनौ ,देश नेताले बिगारे ,देश बेच्चियो ,भारतीय हाम्रा दुश्मन हुन्  हाम्रा लागी कसैले केहि गरि दिएन भन्ने गजबका चिन्तन अनि असन्तुष्टि आज छरपष्ट देखिन्छ/छ । हामी आफ्नै परिवार ,बाबु आमा ,दाजु भाई ,दिदिबहिनीहरुमै त सन्तुष्ट छैनौ देशको  र  नेताको कुरा त अलि पर नै पो त ।
जीवन सन्तुष्टि र असन्तुष्टि बीचको झेलाई,भोगाई त रहेछ जसलाई आफैले संचालन/नियन्त्रण गर्ने  ।  केहि हुनु र नहुनुको गुनासो जती सबै केहि दिनका उधारो हिसाब न हुन्  एकदिन नियतीको बहीखातामा बुझाउन अनि अर्को यात्रा शुरु गर्न बहाना  । तर संसारमा यस्ता उदाहरण प्रसस्त छन जहाँ एकता एक्लो व्यक्तिको दृढ चाह र आँटले इतिहास लेखेको छ ।
यो सबै लेखेर यहाँ "हाई" आउने बनाउनुको पछी मैले पढेको एक युवतीको जीवनी (छोटकरीमा ) हो ।  इजराइलमा गएको  हप्ताको  (१०/५/२०१३ ) साप्ताहिक पत्रिका "7 Days (7यामिम)  नामक पत्रिकामा नजर गयो । एउटी युवतीको तस्विर जुन पहिलो पेजमा नै थियो ले अनयासै तान्यो अनि पन्ना पल्टाउदै जाँदा उनको बारेमा लेखिएको लामो स्तम्भ नै थियो "खुला आकाश " को शिर्षक सहित । खै किन हो त्यसै कौतुहलता जाग्यो उनि बारे जान्न अनि पत्रिकामा घोत्लिदै गए साथै छेउछाउ बसेका इज्राईलीहरुसंगको सोधाई बाट जती जान्दै गएँ  उनको बारेमा लेखिएका एक एक शब्दहरुले  मन मस्तिष्कमा एउटा छाप बनाउदै गयो जुन मरणोपरान्त मात्र मेटिनेछ ।

"आलीस मिलर "
एउटी युहुदी युवती जसले इजराईलमा एउटा इतिहास कोरेकी छन् र उनि पछीका महिलाहरुको लागी नयाँ बाटो बनाएकी छन ।
साउथ अफ्रिकामा जन्मेकी आलीस मिलर ६ बर्षको उमेर हुदाँ इजराईल आएकी थिईन आफना आमा बाबु संग ।
उनको स्कुले शिक्षा होदाहा शरोन भन्ने शहरमा सकियो । सानै देखि तीक्ष्ण बुद्धि भएकी उनि आफ्नो समयमा आएर यती फरक होलिन भनेर सायदै कसैले सोचेका थिए होला ।
स्कुले शैक्षिक सत्र समाप्ती पछी इजराईलको नियम अनुसार सरकारलाई दुइ बर्षे श्रमदानको लागी उनले हवाई सेनालाई चुन्दै एयर फोर्स जोईन गरिन । त्यहि समयवधिमा नै उनले आफु भविष्यमा पनि एक कुशल पायलट (लडाकु बिमानको ) भएर आफ्नो जीवनयात्रा यहि एयर फोर्स संगै राख्ने निर्णय गरिन ।
यस्तो सपना देख्नु कुनै चानेचुने कुरा थिएन यहाँ पनि । उनले सपना मात्र देखिनन त्यसलाई यथार्थमा परिणत गर्नको लागी कम्मर कसिन ।  उनको त्यो इच्छा उनले एयर फोर्समा राखिन तर राष्ट्रको कानून अनुसार मात्र पुरुषलाई लडाकु बिमान उडाउने अधिकार थियो । त्यसैले उनलाई देशको र एयर फोर्सको कानूनलाई मानेर हिड्ने आग्रह गरियो  । उनलाई यो मन्जुर थिएन कि पुरुषले मात्र यो मौका पाउन र किन उनीहरु मात्र ? यो प्रश्नको जवाब खोज्दै  उनि अदालत पुगिन आफ्नो रहरलाइ दृढता बनाएर  ।  त्यस पछी उनको जीवनको एेतिहासिक पानाहरु कोरिन शुरु भयो । उनि धेरै विवाद अनि सबैको आँखामा परिन यो साहसले । स्वभाबिक्त बिरोध अड्चन आए तर उनको हौसला कम भएन  । उनको बौद्धिकता ,आँट र हौसलाले भरिएको दलिलको अघि अन्तमा न्यायधिस पनि नतमस्तक भए र  उनलाई  अनुमती दिदै आउने दिनहरुमा क्षमतावान महिलाहरुलाई यो अधिकार दिने भनेर निर्णय लेखे । उनले आफ्नो जित यसैलाई भनेकी छन  । यती बेला सम्म उनि निकै चर्चामा आइसकेकी थिइन् अब झन् उनको नाम नै इजराईलको  इतिहासमा लेखियो  । उनि एक चम्किलो ताराको रुपमा प्रसिद्ध भईन  । नाम सहित उनका फोटाहरु हरेक पत्र पत्रिका अनि समाचारमा थिए । उनको नाम बच्चा बच्चा सम्म फैलियो । त्यस पछी उनि आफ्नो सपनालाई अमुर्त रुप दिन एयर फोर्सको परिक्षाको तयारीमा लागीन  तर दुर्भाग्य उनले पाइलटको लागी सैनिक प्रशिक्षण पास गर्न सकिन्न । उनि त्यो परिक्षामा असफल भए पनि आज उनकै कारण  इजराईलमा महिलाहरुको लागी त्यो बाटो खुल्ला भएको छ । उनि निराश भईनन ।  सैनिक परिक्षामा अनुतिर्ण भए पनि उनले आफ्नो सपानालाई आकाशमा उडाएरै छोडिन । उनि पाइलटको कोर्स गरेर एक कुशल पईलट भईन साथै हाइफा शहरमा अवस्थित प्रसिद्ध टेक्नियन कलेजबाट टेक्नोलोजी साइन्समा पढाई सकिन । त्यति बेला सम्म उनि र उनको नाम हरेकले उदाहरणको रुपमा लिन थालेका थिए  ।  युनीवर्सीटीको पढाईको समाप्ती लगत्तै उनि एसियन देशको निरीक्षण साथै केहि महिना घुमघाम गर्दै गुमनाम हुने सोच बनाएर भारत पुगिन । जिन्दगी मान्छे सोचेको जस्तो कहाँ हुन्छ र ? भोलीको निर्णय समयले न हो गर्ने । भारत घुम्ने क्रममा नै उनि एउटा भारतीय युवकसंग प्रेममा परिन । हामी भन्छौ पश्चिमेलीहरु प्रेम कहाँ बुझछन र ? तर प्रेमलाई बुझ्न र बुझाउन कुनै जात, देश ,समाज सिमा कसैको पाबन्दी छैन ।  इजराईलमा नाम, दाम सहित प्रसिद्धि कमाएकी  मल्टी ट्यालेन्ट युवतीले भारतको एउटा सामान्य केटासंग बिहे गरेर भारतको उत्तराखण्डमा पर्ने सामान्य ठाउँ शिवानंदीमा आफ्नो जीवन बिताउदै छन बिगत आठ बर्ष देखि  । उनि आफ्नो जीवनमा पूर्ण सन्तुष्ट रहेको बताउछिन । उनको बिहेमा परिवार सहित ४० जना इजराईलीको उपस्थिती थियो र बिहेमा कुर्ता र साडी लगाएको बयान गरेकी छन । उनका दुइ छोरी छन् जसले प्रकृती संग आफ्नो बाल्यावस्था बिताउदै  छन र त्यहि बाट नै शिक्षा लिदै छन   ।  उनका दुवै छोरी घरमै सामान्य प्रसुती द्धारा जन्मेका हुन् किनकि अस्पताल जान ६ घण्टाको सडक दुरी नाप्न पर्ने हुन्छ भनेकी छन  । उनले पहिला एक चाइनिज कम्पनि संग प्राकृतिक स्वीमिंग पूलको निर्माण कार्यको लागी काम गर्ने कुरा अनि पछी त्यो कम्पनि घाटामा गए पनि उनलाई केहि नोक्सान नभएको सामान्य जानकारी लेखिएको छ पत्रिकामा ।  हाल उनीहरुको एउटा गेस्ट हाउस छ साथै उनका श्रीमान् गाइड पनि गर्ने गर्छन टुरिस्टहरुलाई   ।   ऋषिकेश ,देहरादून अनि यस्तै अन्य नजिकको पर्यटकीय ठाउँहरु प्रसस्त हुँदा प्रयटकहरुको पक्कै कमी छैन त्यहाँ । इजराईलको सुख सुविधामा हुर्केर आफ्नै बृहद बौद्धिकताले संसारमा नै चिनिन सक्ने र सम्पतीमा मिलियोनर  हुन् सक्ने  हैसियत /क्षमता भएकी यी युवतीको  सोच,त्याग महानताले मलाई सोच्न बाध्य बनाएको छ र म आफु एक निहायत स्वार्थी रहेछु कि भन्ने एहसास गराएको छ ।
"इजराईललाई हरेक पल सम्झेको र कहिल्यै भुल्न नसक्ने कुरा राख्दै भारतलाई  छोड्न नसक्ने कुरा पनि उनले राखेकी छन "।

यती लामो प्रसंग यहाँ लेख्नुको औचित्य यती मात्र की  " हामी थोरै गरेर धेरै गर्यौ भन्दै नाम,दाम अनि के के भनेर आफैमा लुछाचुडी गर्छौ कोइ धेरै गरेर नाम,दाम सबै छोडेर गुमनाम हुदा पनि जिन्दगीमा पूर्ण सन्तुष्ट भएको र साँचो जीवनको सन्देश दिन्छन " ।
"म मेरो नियतीसंग यती नै भन्छु मलाई केहि नदिनु यहि र यस्तै सन्तुष्टि र धैर्यता दिनु "।